Reformed Witness Hour Message of the Protestant Reformed Churches in America translated by Pastor John Flores

Transcription

1 Reformed Witness Hour Message of the Protestant Reformed Churches in America translated by Pastor John Flores Filipos 3:8 "Kalugihan Upang Magkamit ni Rev. Wilbur Bruinsma Sa Filipos 3:8, si apostol Pablo ay nasangkot sa isang personal na kapahayagan na ginawa niya sa iglesia sa Filipos. Mababasa natin doon: Higit pa roon, ang lahat ng mga bagay ay inaari kong kalugihan dahil sa higit na kahalagahan na makilala si Cristo Jesus na Panginoon ko. Alang-alang sa kanya'y tiniis ko ang kalugihan ng lahat ng mga bagay, at inari kong basura lamang, upang makamit ko si Cristo. Ang kapahayagang ito ay naging resulta ng kanyang pagninilay sa sarili niyang buhay bago ang kanyang pagbabago. Si Pablo ay Hebreo sa mga Hebreo, Fariseo sa pinakamahigpit na katuturan. Mayroon siyang pangalan sa mga Judio at may titulong ipinagmamalaki niya. Napakasigasig niya na magpanatili ng panlabas na kaugalian at mga kautusan ng mga Judio na inusig pa nga niya ang iglesia ni Cristo. Subalit ngayon nakita niya ang kamalian at ang kahangalan ng kanyang daan. Gayunman ang mga bagay na sa akin ay naging pakinabang, isinulat niya sa talatang 7, ay inari kong kalugihan, alang-alang kay Cristo. Matapos ang kanyang pagbabago sa daan papuntang Damasco naunawaan niya na ang lahat ng bagay ay mga dumi lamang sa liwanag ng kaalaman ng kanyang kaligtasan kay Jesu Cristo. Itong mga panlabas na gawa ng kautusan ay walang kinalaman sa pagpapawalang-sala sa kanya. Hindi sila batayan ng kanyang kaligtasan. Sa katunayan, sila ay direktang sumasalungat sa kaligtasan kay Cristo. Samakatuwid, ibinibigay niya ang personal niyang kapahayagan sa talatang isinasaalang-alang natin ngayon. Hindi tayo dapat mabigong makita itong personal na aspeto ng sitas na ito. Ibinulalas ni Pablo: Ang lahat ng mga bagay ay inaari kong kalugihan dahil sa higit na kahalagahan na makilala si Cristo Jesus na Panginoon ko. Alang-alang sa kanya'y tiniis ko ang kalugihan ng lahat ng mga bagay, at inari kong basura lamang, upang makamit ko si Cristo. Hindi natin maaaring basahin ang sitas na ito nang hindi napapansin na ibinubuhos dito ni Pablo ang pag-iisip ng kanyang puso. Ang personal na kapahayagang ito ni Pablo ang nararapat mamutawi sa ating mga labi bilang mga anak ng Dios. Sa pag-ulit natin sa mga salitang ito ng apostol, dapat tayong maging handang gawin itong sarili nating salita. Dapat tayong maging handa na gawin itong direksyon ng sarili nating buhay dito sa kasalukuyang sanlibutan. Dapat nating ipahayag na inaari nating kalugihan ang lahat ng bagay dahil sa higit na kahalagahan na makilala si Cristo Jesus na ating Panginoon. Kaya isinasaisip natin ang personal na aspeto ng sitas na ito. Sa pagsasaisip ng mga salitang ito, mauunawaan natin ang ibig sabihin ni Pablo nang sabihin niya sa atin na dapat maging kalugihan ang lahat upang makamit si Cristo. Upang maunawaan ang kahulugan ng ating kapahayagan, bigyan natin ng maingat na pansin ang ginagawa dito ni Pablo sa talatang ito. Dalawang beses sa talatang ito, at isang beses sa naunang talata, makikita natin ang salitang inari. Si Pablo ay umaari, o inaari. At ang kahulugan niyan ay hindi lang may Page 1 of 5

2 isinasaalang-alang si Pablo. Ipinahihiwatig ng katawagan ang sadya at maingat na ginagawang pagpapalagay ni Pablo. Sa madaling salita, ibig sabihin ni Pablo na kinukuha niya ang dalawang magkaibang bagay at tinitimbang sila, isa katapat ng isa. Inihahambing niya sila. Masusi niyang sinisiyasat kapwa ang mga pakinabang at di-pakinabang, ang malalakas na punto maging ang mahihinang punto, at gumagawa ng pinag-isipang palagay upang dumating sa isang tiyak na pasya tungkol sa dalawang bagay na ito. Inilalagay niya ang mga ito sa timbangan, wika nga, upang makita kung alin sa kanila ang mas mahalaga sa kanya. Isa pa, isaisip din natin na itong pag-aari, itong maingat na pagtitimbang at paghahambing, na ginagawa ni Pablo bilang anak ng Dios, isa na kung saan ay gumawa si Cristo sa pamamagitan ng Kanyang Espiritu. Siya ang isa na naliwanagan sa biyaya ng Dios. Ang isang di-mananampalataya ay hindi makakarating sa parehong pasya na naabot ni Pablo sa ating teksto. Ang paghahambing na ginagawa niya ay espiritual na nangangailangan ng puso at kaluluwang may kakayahang gumawa ng gayong mahalagang pagpapasya. Ang dalang-kahulugan ay hindi lahat ng tao ay makakagawa ng maingat na pagsusuring ginagawa dito ni Pablo. Subalit ano itong pinaghahambing ni Pablo? Sa isang bahagi ng timbangan naroon ang lahat ng bagay na pinagpapasyahan ni Pablo, sa kabilang bahagi ng timbangan, ang pagkakilala niya kay Cristo Jesus na Panginoon. Malinaw na ang lahat ng bagay sa ating teksto ay sinadya na maraming saklaw at kasama na ang lahat. Sa katunayan, kasama dito ang anuman at lahat na nasa labas na pagkakilala kay Cristo at sa kanyang kaligtasan kay Cristo. Sa madaling salita, si Pablo ay nakatingin, una sa lahat, sa lahat ng mayroon siya o lahat ng siya sa buhay na ito, maging ito ay ang kanyang karangalan, ang kanyang titulo bilang isang Fariseo, o maging ang kanyang lahi sa salinlahi ng Israel, o ang mga batas at mga tradisyon na kanya bilang isang mabuting Judio. Tungkol sa mga ito, siya ngayon ay gumagawa ng pasya sa kanilang tunay na halaga kapag inihambing sa pagkakilala na ipinagkaloob sa kanya ni Jesu Cristo at sa kanyang kaligtasan. Tayo, kasama ni Pablo, ay gumagawa ng pareho ring sadyang pagpapasya. Gaano karami ang lahat ng bagay nitong kasalukuyang buhay, ang katanyagan nito, ang kaluwalhatian nito, ang katayuan nito, ang kayamanan nito, kung ihahambing sa pagkakilala na ipinagkaloob ng Dios sa atin kay Cristo at sa ating kaligtasan? Subalit mayroon pa sa paghahambing na ito. Makikita nating iyan ang kalagayan sa talatang 9 ng kapitulong ito. Isinulat ni Pablo: At ako'y matagpuan sa kanya, na walang sarili kong katuwiran na mula sa kautusan, kundi ang katuwiran sa pamamagitan ng pananampalataya kay Cristo, ang katuwirang buhat sa Dios na batay sa pananampalataya. Gaano ako umaasa sa aking sarili sa sarili kong mga gawa at katuwiran upang magkamit ng kaligtasan? Ang akin bang sigasig para sa katuwiran ay isa na nagpapanatili ng panlabas na kabanalan, sa pagpapanatili ng panlabas na mga gawa, at hindi ng panloob na kabanalan ng puso? Gaano kahalaga ang lahat ng mga ito sa akin? Lahat ng mga tanong na ito ay kinakaharap natin kasama ni Pablo habang inihahambing natin sila sa ating pagkakilala kay Jesu Cristo na ating Panginoon. Ang mga bagay na ito ay nakalagay sa isang bahagi ng timbangan at tinitimbang katapat ng mga bagay na inilagay sa kabilang bahagi ng timbangan, na siyang pagkakilala kay Cristo. Ngunit ano ang ipinagkaloob sa atin upang makilala si Cristo? Ito. Sa isang banda, na Siya ay si Jesus, ang Isa na nagsagawa ng ating kaligtasan, ang Isa na, sa Kanya mismong pagkatao, ay ang kapahayagan ni Jehovah, ang tapat na Dios ng ating kaligtasan. Iniligtas tayo ng Jesus na ito mula sa ating mga kasalanan. Iyan ang kahulugan ng Kanyang pangalan. At ginawa Niya ang gayon sa pamamagitan ng pagtungo sa daan ng krus, binayaran ang halaga ng ating mga kasalanan, inalis ang ating sala, at ibinilang sa atin ang Kanyang katuwiran kapalit ng ating sala. Itong pangalan ng ating Tagapagligtas ay nagsasalita sa atin ng katotohanan na ginawa tayong kabahagi ng ating Tagapagligtas ng pinakamataas na posibleng kabutihan. Tinubos Niya tayo mula sa kabulukan at pinanumbalik tayo sa kagandahang-loob at pakikipagkaibigan ng Dios. Page 2 of 5

3 Pinagkakalooban Niya tayo, sa pamamagitan nito, ng galak at kapayapaang di-masambit, ng kaginhawahan na hindi kailanman makakamtan sa pamamagitan ng mga makalupang pag-aari at mahigpit na pagtupad sa kautusan. Kamangha-manghang kaloob ang mahugasan sa mahalagang dugo ni Jesus at malaman na pinatawad na tayo sa ating mga kasalanan. Pangalawa, ang pagkakilalang mayroon tayo kay Jesu Cristo ay matatagpuan doon sa pangalang Cristo. Ang Cristo ay nangangahulugang Siya ang Isang pinahiran ng Dios. Siya ang Isang pinahiran bilang ating Propeta, Pari, at Hari banal na Tagapamagitan na nagsasagawa para sa atin ng ganap na gawa ng kaligtasan. Bilang ating Propeta, ipinahahayag Niya sa ating puso ang Amang makalangit at ipinatitikim at ipinapakita sa atin ang kayamanan ng tipan ng Dios na itinatag sa atin. Bilang ating Pari, gumagawa Siya sa atin sa pamamagitan ng Kanyang Espiritu ng pagtatalaga sa atin para sa banal na gawain ng paglilingkod sa ating Panginoon at nagbabago sa atin at naglilinis sa atin mula sa lahat ng karumihan at kabulukan ng kasalanan. At bilang ating Hari, Siya lamang ang ibinitin sa krus at lumaban sa pinakamabagsik na labanan at lumitaw bilang Isa na mapagtagumpay. Nilupig Niya ang kasalanan at kamatayan para sa atin at ibinigay sa atin ang tagumpay. Ang Cristong ito, sa ikatlong banda, ay ating Panginoon. Iyan ang pagkakilala natin sa Kanya. Siya ang ating Panginoon na bumili sa atin sa pamamagitan ng Kanyang mahal na dugo. Siya ang Isa na ngayon ay namumuno sa lahat ng mga bagay at nagtutuon sa kanila sa ating lubos at ganap na kaligtasan. Siya yaong Panginoon at Guro na namumuno sa ating buhay, nangunguna at gumagabay sa atin patungo sa walang hanggan nating tahanan. Iyan ang pagkakilala natin, ngayon, kay Jesu Cristong ating Panginoon. Ang pagkakilalang iyon ay ang pagkakilala ng pananampalataya, ang pagkakilala ng puso. Ang ating Panginoon at Tagapagligtas, sa buo Niyang kaganapan at kagandahan, ay hindi lamang isang sinusuri natin sa haba ng ating mga braso, ngunit walang tunay na epekto sa ating buhay. Kung iyan ay tunay kay Cristo, kung gayon ang pagkakilala natin ay hindi na rin magiging personal na napakahalaga sa atin, di ba? Subalit ang ating pagkakilala ay isa na kung saan ay niyayakap natin si Cristo sa ating sarili, at nanghahawakan sa Kanya, at nagtitiwala sa Kanya sa panahon at walang hanggan. At kilala natin si Cristo bilang ating Panginoon, bilang tanging pinagmumulan ng ating kaligtasan. Alam natin na mayroon tayong kaligtasan walang iba kundi kay Jesu Cristo ang kaligtasan na sa atin ay napakahalagang pag-aari sa sanlibutan. Gaano tayo nananabik na tumayo sa presensya ng Dios at makita Siya ng mukhaan! At alam natin, naniniwala tayo, na ang tanging daan patungo sa presensya ng buhay na Dios ay sa pamamagitan ng mahal na Tagapagligtas. Nakikita mo ba ang halaga na dapat nating makita sa ating Tagapagligtas? Kung hindi natin nalalaman o nauunawaan ang lahat ng ginawa Niya para sa atin, at kung hindi natin lubos na nauunawaan ang halaga ng krus, hindi natin makakaya kailanman na gumawa ng tamang pagpapasya sa pagitan ng ating pagkakilala sa Kanya at sa lahat ng iba pang mga bagay. At kapag ginawa natin, makikita natin na ito ang kinalabasan ng ating pag-ari: Inaari kong basura ang lahat ng bagay kung ihahambing sa higit na kahalagahan na makilala si Cristo Jesus. Masasabi mo ba iyan? Masasabi ba natin iyan tungkol sa ating mga tinatangkilik? Masasabi ba natin iyan tungkol sa ating kalagayan at katayuan sa sanlibutang ito? At mayroon pa, masasabi ba natin iyan tungkol sa lahat ng mga ginagawa natin? Sila ay mga basura lamang. Wala silang ipinagkaiba sa isang malaking tambak ng dumi. Si Pablo ay gumagamit dito ng katawagan na walang itinatago. Ang lahat ng mga bagay ay mga basura lamang, sila ay mga dumi, sila ay tinatanggihan, yamang wala silang halaga sa kanilang sarili kahit anoman. Ang lahat ng mga bagay ay walang halaga, kasuklam-suklam pa nga. Sila ay pangit sa paningin at sila ay nangangalingasaw. Iyan ay totoo sa lahat ng bagay kapag sila ay inihambing sa pagkakilala na ipinagkaloob sa atin ng biyaya ng Dios kay Cristo. Yaong kahanga-hangang pagkakilala kay Cristo at sa kaligtasan ay may malaking halaga kay Pablo na nakikita niya itong napakagaling. Nakikita niya Page 3 of 5

4 itong pagkakilala na napakataas, lubos na nakahihigit sa anumang nalalaman niya sa buhay na ito. Ito ay may gayong nakahihigit na halaga sa kanya na ang lahat ng iba pa ay tila naglalaho sa paligid. Ngayon, dahil sa higit na kahalagahan ng makilala si Cristo, isang bagay lamang ang pinahahalagahan ni Pablo: na makamit niya si Cristo. Iyon ang kanyang layunin. Iyon ang kanyang hangarin sa buhay: ang makamit si Cristo. At gayunpaman nalalaman niya na itong pagkakamit ay maaari lamang dumating sa pamamagitan ng pagkalugi, sapagkat ang pagkakamit kay Cristo ay sumasalungat sa mga bagay ng sanlibutang ito. Maaari niyang makamit si Cristo at mawala ang lahat ng mga bagay, o makamit ang lahat ng mga bagay at mawala si Cristo. Kaya nga sinasabi niya sa atin sa ating teksto: Alang-alang sa kanya'y tiniis ko ang kalugihan ng lahat ng mga bagay, at inari kong basura lamang, upang makamit ko si Cristo. At kapag si Pablo ay nagsasalita sa pagkakamit kay Cristo wala sa kanyang isipan na si Cristo ang malaking gantimpala ng paligsahan. Ang ibang mga sitas ng Kasulatan ay maaaring nagsasalita sa ganitong paraan, ngunit hindi ang talatang ito. Sa katawagang ito makamit, nagsasalita si Pablo tungkol sa pagtatamo kay Cristo, o makamtan si Cristo. Si Pablo ay nagsasalita tungkol sa isang pagnanasa na makamit si Cristo iyon ay, ang kanyang hangarin sa buhay, ang kanyang layunin sa pamumuhay, ay ang matanggap o matamo sa kanyang sarili si Cristo at lahat ng mga pakinabang ng kaligtasan na matatagpuan kay Cristo. Kasi, nang pumunta si Cristo sa daan ng krus, natamo Niya lahat nitong mahahalagang pagpapala na kasama ng ating kaligtasan. Siya, kung gayon, ang imbakan, ng lahat ng mga pagpapalang ito. Sila ay may napakayamang halaga sa anak ng Dios. Ngunit upang maging atin ang mga pagpapalang iyon, kailangan nating lumapit sa Dios ng may pananampalataya. Dahil ang pagkakilala kay Cristo ay higit na mahalaga sa kanya, at dahil ang lahat ng iba pa ay basura, tiyak na aabutin ni Pablo ang higit na kahalagahan na makilala si Jesu Cristo. At, sa paraang ito, niloob niyang makamit si Cristo. Sa katunayan, habang nakatingin sa mga bagay ng sanlibutang ito ang kanyang katayuan, lahat ng ibinigay sa kanya matapang niyang sinasabi na inaari niyang kalugihan ang lahat ng mga ito. Naniniwala siyang ang mga bagay sa sanlibutang ito ay maghahatid lamang ng di-magandang kalagayan at magiging sanhi ng pinsala sa kanyang nag-iisang tunay na ninanasa, ang kanyang nag-iisang tunay na hangarin o layunin. Sila ay nakapipinsala, samantalang ang pagkakilala kay Cristo ay higit na mahalaga. At iyan din ay totoo. Tunay na kapag nakamit natin si Cristo ay mawawala sa atin ang lahat ng bagay. Para sa Kanya, para kay Cristo, sabi ni Pablo, tiniis ko ang kalugihan ng lahat ng mga bagay. At tiniis ko ang kalugihan ng lahat ng mga bagay dahil mismo sa ako ay kabilang kay Jesu Cristo. Paano ikinalugi ni Pablo ang lahat ng mga bagay? Tingnan mo kung sino siya dati. Mayroon siyang pangalan sa Israel. Mayroon siyang titulo. Siya ay isang Fariseo, isang guro, iginagalang, may mataas na katayuan sa mga Israelita. Nawala lahat ng iyon sa kanya. Nawala ang kanyang mga ari-arian. At sa huli, nawala ang kanyang buhay para kay Cristo. Si Pablo, sa kanyang sarili, ay hindi isinuko ang kanyang mga kagalingang Judio, kundi ginawa ni Cristo na iwala sila doon sa daan papuntang Damasco. Tayo sa ating sarili ay hindi lamang basta isinusuko ang mga bagay ng sanlibutang ito. Kundi kapag tayo ay inilapit kay Jesu Cristo, kadalasang nawawala sa atin ang mga bagay na ito. Sa pamamagitan ng paggawa sa atin ng pagnanasa na makamtan lamang ang Kanyang mga pakinabang at mga kaloob, ginagawa din naman Niya sa atin na ang lahat ng iba pa ay sumusunod dito. Handa tayong isuko ang lahat para kay Cristo. Sapagkat sa ganang akin ang mabuhay ay si Cristo, at ang mamatay ay pakinabang, sabi ni Pablo sa Filipos 1:21. Iyon ang mahalaga. Ang lahat ng iba pang bagay sa buhay na ito ay di-mahalaga. Maging ang buhay natin mismo ay wala kung ihahambing sa pagkakamit kay Cristo. Ngayon, iyan ay hindi nangangahulugan, syempre, na dapat nating itapon ang lahat ng ating mga pag-aari o alisin sa ating sarili ang mga titulo natin sa buhay na ito. Kundi dapat nahahanda nating isuko sila alang-alang kay Cristo. Alin ang mas nanaisin nating makamtan? Nanaisin ba natin ang mga kayamanan, Page 4 of 5

5 ang katanyagan ng sanlibutang ito? O mas ninanais ba natin ang mga kayamanan na nakay Cristo Jesus? Alin ang mas kaakit-akit sa iyo at sa akin? Iyan ang tanong na kinakaharap natin na may kaugnayan dito sa personal na kapahayagan ni apostol Pablo. Huwag nating kalimutan na ito ay isang personal na kapahayagan na ginawa ng apostol. Upang ikaw at ako ay makasama sa kanya sa gayong kapahayagan ay nangangailangan na tayo, kung paanong siya, ay mabuhay sa pananampalataya. Ang pananampalataya ay laging kinakailangan upang tayo ay makagawa ng gayong kapahayagan. Sa pamamagitan ng puso tayo ay sumasampalataya, at sa pamamagitan ng bibig tayo ay nagpapahayag. Kapag pinag-aalinlanganan natin ang higit na kahalahagan na makilala si Cristo o kapag, sa kawalang-pananampalataya, tayo ay hindi lubos na nasisiyahan sa pagkakilala kay Cristo, kapag ang ating espiritual na buhay ay inilagay sa likuran at ang mga bagay nitong sanlibutan ay naging una sa atin, kung ang pagbabasa ng Biblia at pananalangin ay hindi mahalagang oras ng araw sa atin, kung gayon ang kapahayagang ito ay halos hindi maaaring maging atin. Sa gayon ang timbangan, ay magsisimulang umugoy sa maling direksyon. Ang kawalang-pananampalataya ay hindi naghatid ng gayong kapahayagan sa mga labi ni Pablo. At ang kawalang-pananampalataya ay hindi rin maghahatid nito sa atin. Sa salungat, ito ay maghahatid lamang ng kabaliktaran. Nanaisin nating makamtan ang lahat ng mga bagay at aariin nating basura ang pagkakilala kay Cristo. Kapag ikaw at ako ay nagpasimulang higit na pahalagahan ang mga bagay ng sanlibutang ito, kapag sinimulan nating higit na pahalagahan ang sarili nating mga gawa sa halip na ang ginawa ni Cristo para sa atin sa buhay na ito, makikita ito sa timbangan. Kung nakikita natin ang pagkakilala kay Cristo ay higit na mahalaga, higit sa lahat ng anuman sa buhay na ito, makikita din ito sa timbangan. Kaya sinusuri natin ang ating mga buhay at tinatanong ang ating sarili, Magagawa ba natin ang ganito ring personal na kapahayagan na ginawa dito ni apostol Pablo? Oo, walang alinlangan, sasabihin natin. Walang pag-aalinlangan na inaari kong kalugihan ang lahat ng mga bagay dahil sa higit na kahalagahan na makilala si Cristo Jesus na Panginoon ko. Iyan ang ating kapahayagan. At lagi nating aariin ang mga bagay na ito na basura lamang, dahil wala nang mas mahalaga pa sa atin bilang mga anak ng Dios kaysa kay Jesu Cristo na ating Panginoon. Iyan ba ang ating pananampalataya? At sa pananampalatayang iyan, ginagawa ba natin ang kapahayagang iyon? Kung gayon sa pananampalatayang iyan ikaw at ako ay nakamit na si Cristo. Manalangin tayo. Ama, hinihiling namin sa Iyo na gagawa Ka sa aming mga puso sa pamamagitan ng Iyong Espiritu at biyaya upang makita namin ang kayamanan na matatagpuan lamang kay Jesu Cristo, at sa pagkakatagpo sa mga kayamanang iyon, masasabi namin sa sarili naming mga buhay na sila ay higit na mahalaga sa amin kaysa anuman sa buhay na ito, at handa kaming mawala ang lahat upang makamtan namin si Cristo. Gawin Mo itong kapahayagan ng aming mga puso upang maging kapahayagan din naman ito ng aming mga labi. Pagpalain Mo kami ngayon sa pamamagitan ng Iyong Salita, alang-alang kay Jesus, Amen. Page 5 of 5